Trending News

મરાઠાઓની જંગી રેલી

August 9, 2017

શિક્ષણમાં સરકાર આપશે સહાય

મુંબઈ: મરાઠાઓએ આજે મહારેલી કાઢીને આખા મુંબઈની રફ્તાર અટકાવી દીધી છે, ત્યારે હરકતમાં આવેલા સીએમ દેવેન્દ્ર ફડણવીસે તાત્કાલિક મરાઠાઓ માટે કેટલીક જાહેરાત કરી છે. સીએમે ઓબીસીને 605 જેટલા અભ્યાસક્રમોમાં અપાતી ફીમાં રાહતનો લાભ મરાઠાઓને પણ આપવાની જાહેરાત કરી છે. આ ઉપરાંત, મરાઠા વિદ્યાર્થીઓ માટે દરેક જિલ્લામાં જમીન આપી તેના પર હોસ્ટેલ બનાવવા પાંચ કરોડની સહાય આપવાની પણ જાહેરાત કરી છે.

કલાકો સુધી રહ્યો ટ્રાફિકજામ

આજે મુંબઈમાં મરાઠા સમુદાયના લાખો લોકોએ જંગી રેલી કાઢી હતી, જેના કારણે સમગ્ર મુંબઈ ઠપ્પ થઈ ગયું હતું. મુંબઈના અનેક સ્થળોએ રેલીના કારણે કલાકો સુધી ટ્રાફિક જામ થઈ ગયો હતો, અને અનેક રસ્તાઓ બંધ કરવામાં આવ્યા હતા. જેના કારણે સવારે ઓફિસ જવા નીકળેલા લોકોને મુશ્કેલીનો સામનો કરવો પડ્યો હતો. મરાઠા સમુદાયના લોકોની આ એક વર્ષમાં 58મી શાંતિપૂર્ણ રેલી છે. તેમની મુખ્ય માંગ સરકારી નોકરી તેમજ શિક્ષણમાં અનામત મેળવવાની તેમજ 14 વર્ષની મરાઠા કિશોરી પર થયેલા ગેંગરેપમાં ન્યાય અપાવવાની છે.

Image result for maratha kranti morcha

બેકવર્ડ ક્લાસ કમિશન સ્થપાશે

સીએમ ફડણવીસે શિક્ષણમાં મરાઠાઓને સરકાર તરફથી તાત્કાલિક રાહત આપવા માટે જાહેરાત કરી નાખી છે, જ્યારે સરકારી નોકરીઓમાં અનામત અંગે તેમણે જણાવ્યું છે કે, સરકાર આ અંગે બેકવર્ડ ક્લાસ કમિશનની સ્થાપના કરશે. આ કમિશન મરાઠાઓની સ્થિતિનો અભ્યાસ કરી તેમને અનામત આપી શકાય તેમ છે કે કેમ તેનો રિપોર્ટ આપશે. ફડણવીસે કહ્યું હતું કે, તેઓ કમિશનને વિનંતી કરશે કે તે પોતાનો રિપોર્ટ ઝડપથી બોમ્બે હાઈકોર્ટને સોંપે.

કોપારડી ગેંગરેપ કેસમાં ન્યાયની માગ

સમગ્ર મહારાષ્ટ્રમાં ચર્ચાસ્પદ બનેલા કોપારડી ગેંગરેપ કેસ અંગે ફડણવીસે જણાવ્યું હતું કે, કેસની સુનાવણી ઝડપથી ચાલી રહી છે. સરકારી વકીલ ઉજ્જવલ નિકમ પાંચ મહિનામાં 31 સાક્ષીઓને વેરિફાઈ કરી ચૂક્યા છે. જોકે, બચાવ પક્ષના વકીલ કેસમાં મોડું કરી રહ્યા છે.

Image result for maratha kranti morcha

સાઉથ મુંબઈમાં થઈ રેલી

મહારાષ્ટ્રની કુલ વસ્તીમાં મરાઠાઓનું પ્રમાણ 35 ટકા છે. કેસરી સાફા બાંધી હાથમાં કેસરી ઝંડા લઈને આજે લાખો મરાઠાઓએ સાઉથ મુંબઈના જેજે ફ્લાયઓવર પર કૂચ કરી હતી, જેના કારણે આ વિસ્તારને ટ્રાફિક માટે બંધ કરી દેવાયો હતો. આ રેલીમાં કોઈ સૂત્રોચ્ચાર કે ભાષણ નહોતા કરાયા. આ રેલીનું આયોજન સકલ મહારાજ સમાજ દ્વારા કરાયું હતું. મહારાષ્ટ્ર વિધાનસભામાં પણ મરાઠાઓને અનામત આપવા મામલે ખાસ્સો હોબાળો થયો હતો.

VIA : iamgujarat

Post your Business Listing on Gujaratis.org Absolutely FREE!